მთავარი » ფაილები » მედიცინის სიახლენი |
2012-04-10, 9:15 PM | |
ზამთარი გაციების გარეშე იშვიათად ჩაივლის. გაციება სხვადასხვანაირად ვლინდება, მაგრამ ხველა მისი მუდმივი თანამგზავრია. როგორ ავაცილოთ ბავშვს თავიდან შემაწუხებელი ხველა? ამის შესახებ პედიატრი მაკა შარაშენიძე გვესაუბრება.
ხველა ორგანიზმის რთული დამცველობითი რეაქციაა. იგი სასუნთქი გზების, კერძოდ, მათი მგრძნობიარე რეცეპტორ-უჯრედების გაღიზიანების შედეგად წარმოიშობა. ეს რეცეპტორები განლაგებულია ხახის, ხორხის, ტრაქეის, ბრონქების ლორწოვან გარსებზე, გამღიზიანებლის როლი კი შეიძლება შეასრულოს აქროლადმა ქიმიურმა ნივთიერებამ, მშრალმა ჰაერმა, მტვერმა... სავსებით ჯანმრთელმა ბავშვმა დღეში შესაძლოა რამდენიმეჯერ წამოახველოს. ამან არ უნდა შეგვაშინოს - ასეთი ხველა მხოლოდ ყელის ჩაწმენდას ემსახურება. ხველის დროს სასუნთქ გზებში საგრძნობლად იმატებს ჰაერის წნევა და ამოსუთქვისას წარმოიქმნება ჰაერის ნაკადი, რომელიც გამოაძევებს დაგროვილ ნახველს (მასთან ერთად კი ბაქტერიებს, ვირუსებს), მტვრის ნაწილაკებს, მცირე ზომის უცხო სხეულებს და სხვა. ამიტომ ყოველთვის როდია სასურველი ხველის დათრგუნვა - იგი, გარდა იმისა, რომ დაავადების ნიშანია, გამღიზიანებელთან ბრძოლის ერთ-ერთ საშუალებასაც წარმოადგენს.
განსაკუთრებული ყურადღებაა საჭირო, თუ ხველა რამდენიმე კვირა ან თვე გაგრძელდა. თუ შეამჩნიეთ, რომ უკვე რამდენიმე თვეა, ბავშვი წამოახველებს აქტიური მოძრაობის, თამაშის დროს ან დილაობით, გაღვიძებისას, აუცილებლად მიმართეთ ექიმს - ეს შესაძლოა რომელიმე ქრონიკული დაავადების მანიშნებელი იყოს, მათ შორის - ბრონქიტისა, ქრონიკული პნევმონიისა, ბრონქული ასთმისა და ტუბერკულოზისაც კი. ხანგრლივი ხველა მძიმედ აისახება ბავშვის მდგომარეობაზე: პატარას უტყდება ძილი, მუდმივად გაღიზიანებულია, ჭირვეულობს, ჰიპოქსიის (ჟანგბადის ნაკლებობის) გამო სტკივა თავი, ეუფლება ასთენია (ზოგადი სისუსტე). | |
ნანახია: 1369 | რამოტვირთვები: 0 | |
სულ კომენტარები: 0 | |